Lögreglumaður, sem ákærður hefur verið fyrir að hafa tekið ungan pilt kverkataki í verslun 10-11 í Grímsbæ í lok maí, neitar sök í málinu.
Ákæra ríkissaksóknara á hendur honum var þingfest í dag. Málið vakti mikla athygli enda sáust myndir af atvikinu á myndbandavefnum YouTube. Þar sést lögreglumaðurinn ráðast á piltinn eftir að hafa beðið hann um að tæma vasa sína.
Lögregluyfirvöld á höfuðborgarsvæðinu ákváðu í kjölfar þess að málið kom upp að lögreglumaðurinn skyldi ekki sinna störfum á meðan Ríkislögreglustjóri tæki ákvörðun um hvort vísa bæri manninum frá störfum á meðan á rannsókn ríkissaksóknara stæði.
Maðurinn kom hins vegar aftur til starfa í sumar og er enn við störf að sögn Guðmundar Guðjónssonar hjá Ríkislögreglustjóra. Honum verður ekki vikið úr starfi að svo stöddu.
Aðalmeðferð í málinu verður 10. október.
