bmwkraftur.is

by ta » Thu 22. Sep 2005 01:16

af mbl.

Fór í bíltúr
Upp komst um norskan bifvélavirkja, sem stóðst ekki freistinguna þegar hann fékk rallbíl til viðgerðar og fór í ökutúr. Upplýsingar, sem geymdar voru í GPS-staðsetningarkerfi bílsins, sýndu að bílnum hafði verið ekið á 180 km hraða.

Norska fréttastofan NRK segir að maður nokkur hafi komið með Subaru Impreza WRC rallbíl inn á verkstæði í Kongsberg vestur af Ósló í síðustu viku og beðið um að undirvagninn yrði yfirfarinn. Hafði maðurinn verið að keppa á bílnum og lenti út af veginum.

Nokkrum tímum síðar kom maðurinn og sótti bílinn og fékk að vita að allt hefði verið í lagi. En skömmu síðar sá bíleigandinn, að bremsudiskarnir í bílnum voru dökkbláir, sem benti til þess að honum hefði verið ekið mjög hratt. Með því að kanna upplýsingar og hraða, staðsetningar og ökutíma, sem geymdar voru í GPS staðsetningarkerfi bílsins, kom í ljós að bifvélavirkinn hafði skroppið í ökutúr á bílnum og ekið á allt að 180,6 km hraða á vegi þar sem hámarkshraði var 80 km.

Lögreglan svipti bifvélavirkjann sem er 21 árs ökuréttindum á meðan málið er rannsakað frekar. Maðurinn gæti einnig átt yfir höfði sér fangelsisdóm.