bmwkraftur.is

Erlent | mbl.is | 29.10.2007 | 21:32
Kebabmafía upprætt í Noregi

Norsk lögregla hefur upprætt það sem kallað hefur verið Kebab-mafía, glæpahring sem framleiddi kjöt fyrir kebabstaði án nokkurs eftirlits og án þess að greiða af því nokkra skatta. Sjö hafa verið handteknir og bíða þeirra nú ákærur vegna fjársvika, brota á matvælalöggjöfinni og skattsvika svo nokkuð sé nefnt. Vitað er til þess að a.m.k. einn hafi veikst við að hafa borðað kjötið, en bakteríuinnihald í kjötinu reyndist mun meira en ásættanlegt þykir þar sem lögum um meðferð kjötsins var ekki fylgt.

Rannsókn málsins hófst í vor þegar lögregla og matvælaeftirlit hóf aðgerðir við leynilega kjötverkun í Østfold, verksmiðjan hafði starfað frá árinu 2003 og segir lögregla starfsemina hafa verið svo skipulagða og umfangsmikla, að enginn vafi leiki á að hún flokkist undir skipulagða glæpastarfsemi.

Kjötið var selt á um 100 kebabstöðum í Ósló, talið er að um 500 tonn af kjöti hafi verið seld, að verðmæti um 100 milljóna norskra króna, sem nemur um milljarði íslenskra króna.