Bandaríski gosdrykkjaframleiðandinn Jones Soda ætlar að hefja framleiðslu á drykk með bragði af grænum baunum. Fyrirtækið hefur áður framleitt drykki með óvenjulegu bragði, þar á meðal af ,,fiski-taco" og laxi. Af öðrum bragðtegundum má nefna kalkún með sósu, spergilkál og sætar kartöflur. ,,Grænbaunagosið" er hluti af ákveðinni framleiðslulínu sem nefnist ,,ferðapakkinn".

Talsmaður Jones Soda, Peter van Stolk, segir þessa óvenjulegu drykki seljast hratt upp. Sjálfur geti hann ekki drukkið þá og skilji ekki hvernig aðrir geti það. Það sé þó öruggt mál að Coca Cola og aðrir gosdrykkjarisar muni ekki framleiða jafnóvenjulega vöru. Van Stolk segir bragðtegundamörkin sett við karrí-kjúkling, menn hafi verið sammála um að það væri hreinlega rangt að framleiða drykk með slíku bragði. Sky segir frá þessu.