bmwkraftur.is

Frakkinn Luc Alphand, fyrrverandi heimsmeistari í bruni á skíðum, varð hlutskarpastur á 14. sérleið Dakarrallsins í dag. Þetta er annar sérleiðarsigur hans á þremur dögum en hann keppir á BMW-bíl.
Alphand ók hina 548 km sérleið milli Ayoun El Atrous og Tidjikja í Máritaníu á 6:51,07 klukkustundum. Annar varð Skotinn Colin McRae rúmum 14 mínútum á eftir á Nissanbíl en hann freistaði þess að vinna annan daginn í röð.

Alphand og McRae tókust á um forystu í rallinu í dag. „Ég sá McRae framundan í sandöldunum og hugsaði með mér: „ég ætla að reyna að koma honum á óvart og taka fram úr. Það gerði ég en ég held ég hafi vakið gremju hjá honum í stað aðdáunar því hann tók fram úr mér aftur síðar. Í markinu sagði hann við mig: ég hélt þú værir skíðamaður," sagði Alphand um slaginn við McRae.